【疫境黑天鵝】
上咗十日嘅密集式短期棍波車訓練班(每隔日約半個鐘咁大把)，我要出山喇喇喇喇喇！
話說依家意大利仍然每戶只可以派一個人去買日用品，明明打算下星期先出動，點知⋯⋯
由於我哋計錯倉儲量，意佬話我知屋企冇奶用，我心諗：「你望住我，我身上都唔會搵到幾滴俾你㗎...」於是乎我垃齊架罉就戰戰兢兢咁，一個月以來，第一次揸車步出我嘅山洞。
好彩意大利仲lockdown緊條街冇車，如果唔係一早我以極速5公里/小時由T字路口小路出大路，仲唔俾人小到魚蝦蟹都出齊？一分鐘嘅車程，我用咗...五分鐘。🤭
出到街預咗俾人排擠歧視，我特登唔梳頭，諗住壯吓膽，增強意志為自己打氣，順便由得街上啲人笑我太瘋癲，唔認得我係亞洲人；亦方便萬一我揸揸吓架車死火俾人撞，人哋都會當我癲嘅唔同我爭論自動離開🙈
超市較大，裡面都有分芝士檔、菜檔、海鮮檔等賣新鮮食材。突然，菜檔個哥哥走埋嚟同我講：「早晨，你對眼好靚啊！」(有啲咁嘅事？)；肉檔叔叔包好肉後，又讚我啲頭髮攣得好特別，問我係咪喺日本嚟（喺意大利人眼中，所有東南亞人個樣都係一樣的）。已習慣喺埃及俾人叫我Corona，呢日戴住口罩嘅我嚇到呆咗，黑天鵝效應，電視新聞提及嘅排華呢？意大利嘅親戚朋友都勸告我唔好單獨出街，好易俾人打，但今日冇人歧視我，竟然仲同我談笑風生？姐我學人行走江湖，居然仍幼稚得只相信事情嘅片面，真係樣衰到冇面見人，好彩個口罩已遮咗我半塊面啫。
無論我哋見過幾多百萬隻白天鵝，都唔代表世上沒有黑天鵝。過渡相信人家的「經驗」只能令我哋活喺框框裡面，禁錮自己嘅思想。自己嘅生命係要自己活出來，就好似今次咁，我硬著頭皮撐到成隻箭豬咁保護自己，驚死有人對我不利，原來跟本冇人對我有惡意，看得見口罩下嘅笑容之餘，菜檔哥仲特登走去收銀隔離嘅雪櫃話我知我想要嗰種急凍蘿蔔菜邊隻牌子最好食。
其實世界仍然好美好，好人好事處處都在，只要你願意張開雙眼，勇於踏出你嘅第一步。
By the way, 我買到奶喇，不過除咗奶呢，勿失良機！我仲買咗少少嘢......👉👈遲少少俾你哋睇吓我仲買咗啲乜。
#意大利抗疫日常
#LockdownInItaly
#媽我終於揸到棍波車喇
#黑天鵝效應
#嫁到意大利
#買奶自己嚟
#行街紙 #手套 #口罩
#Supermarket嘅意大利文係乜？
#Supermercato!
Search